نحن جيل: إجا بابا ..إجا بابا بقلم مايا نهرا

صدى وادي التيم – رأي حر بأقلامكم /

كتبت مايا نهرا  على صفحتها في التواصل الاجتماعي:

وقت نزلت على الجامعة سنة 1999 مرق خمس اسابيع ما طلعت فيها على الضيعة، بتذكر وقت وصلني الشوفير على البيت كان بيي راجع من دكانة المرحوم بو نجيب الحداد وجايبلي سمك للغذاء لاني بحبه، وقتها ركضت لبرا بس صفت سيارته ونطرته لينزل وسلّم عليه ولأول مرة بدل ما سلم عليه قرب وبوسني 3 بوسات…. من فرحتي يومها صرت قول بكرا بس اجي مرة تانية من بيروت الا ما يرجع يبوسني من جديد…
نحن من جيل ما رقصنا وضحكنا واتدلعنا على أبائنا…
نحن من جيل ما كان يقول “بدي” ولا يعرف يقول “لا” لبيّه
نحن جيل ما كان، احتراما، يعللي النظر اعلا من حدود ركبة بيّه
نحن جيل ما تعودنا نمسك ايد أبائنا الا نحن وعم نتعلم المشي او وقت سخنوا ومرضوا
نحن جيل بعدو اجمل عيد بذاكرتهم وقت يسمعوا هدرة سيارته ورنة مفاتيحه ويغنوا بارض الدار اجا بابا.. اجا بابا

وهالصورة فرحت فيها كثير لان بيّي كان عم يضحك فيها ولأن ايده كانت مسنده كتفي
كل عيد أب وجميع الآباء بخير وصحة وعافية والله يرحم كل الآباء اللي تركونا