مطعم البحصاصة: أجمل قعدة عالنبع بأحضان الطبيعة

صدى وادي التيم-سياحة/

شو رأيكن نطلع على جنوب لبنان ونشم هوا جنوبي بهالطقس الحلو؟ مشوارنا اليوم بياخدنا على جوهرة مخباية بالجنوب، بتلاقوا بمنطقة حاصبيا على ضفاف نهر الحاصباني جلسة الأحلام، مطعم نبع البحصاصة ناطركن على أطيب لقمة وأجمل قعدة بأحضان الطبيعة، خلونا نشوف شو قصتو هالمطعم.

مطعم نبع البحصاصة صرلو من ال 1994 بيستقبل الناس على اللقمة اللبنانية الطيبة والقعدة اللي بترد الروح على صوت الميّ الجارية. قعدتو مخباية بالشجر والورد الجوري، طواحين قديمة بقلب الميّ، قرميد أحمر، وجسر زغير فوق النبع بياخدكن على عالم رومانسي وساحر.

تخايلوا حالكن قاعدين على التراس بقعدة حجر وقناطر عالية، وعم تنبسطوا بنسمات الهوا العليلة، وتسرحوا بأجمل المناظر الطبيعية بالمنطقة، من الجبال والشجر والورد والسما الزرقا على صوت النبع، شي بياخد العقل!

لقمة المطعم لبنانية أصيلة ومن أطيب المطاعم لتجربوها بأحضان حاصبيا، بتدوقوا أطيب المشاوي مع الخضرة المشوية، جاط فتوش

مع زبيب وجوز، متبل مزيّن بالرمان، سمك مشوي مع عصرة حامض وصوص طيب، وأكيد مختلف أنواع اللحمة النية مع التحويشة الجنوبية على أصولها.

كمان الحلو انو المطعم بيقدم صالة ساحرة الجمال لأعراسكن ومناسباتكن الحلوة!

شو ناطرين؟ مشوا على حاصبيا اليوم قبل بكرا!

للمزيد من المعلومات، اتصلوا على 000 553 07

المصدر:سارة ترحيني