١١ سوق أثري لازم تزوروهن هالصيفية بلبنان

صدى وادي التيم-سياحة/

هالصيفية، إذا كنتوا ناويين تستكشفوا جمال لبنان وتبرموا بمناطقوا، ما في أحلى من زيارة الأسواق القديمة المنتشرة بكل زاوية من زوايا. هونيك بتلاقوا الأجواء الضيعيجية، المنتجات التقليدية، والقصص اللي بتحكي عن زمن الماضي. حضروا حالكن لتجربة فريدة ما بتنتسا، لأنو كل سوق عندو سحرو الخاص ونكهتو المميزة.

1. سوق دوما الأثري

ما في شي أجمل من سوق دوما العتيق، بتقدروا تتسوقوا من منتجات المونة المحلية الطيبة، أو بس تتمشوا بقلب السوق وبتشموا هوا نضيف وبتاخدوا أحلى صور. هالمحل بيشرح القلب!

٢. سوق البترون

برموا بقلب سوق البترون العتيق وتمشوا بين الدكاكين. ما تنسوا تبوردوا قلبكن بفنجان ليموناضة باردة يلي مشهورين فيها أهل البترون. في كتير إشيا حلوة بهالسوق، متل المطاعم المتنوعة ومحلات التياب والعطور والمجوهرات والفواكة الفريش والبوظة والبريوش الطازة عند كوكو اللي لازم تجربوها!

٣. سوق جبيل العتيق

زوروا هالسوق، شربوا قهوة، ورجعوا تمشوا ع البحر وتفرجوا على المينا. هالسوق مشهور بالمحلات اليدوية والحرفية والمحلات القديمة والكافيهات اللي الكل بيحب يزورهن! ما تفلوا من دون ما تدوقوا البوظة من عند الأبرص.

٤. سوق زوق مكايل

تمشوا بشوارع الزوق الأثرية، وشوفوا أجمل الدكاكين العتيقة. تفرجوا على القصص اليدوية وشتروا تذكارات وتفرجوا على الآثار القديمة وخدوا أجمل الصور.

٥. سوق طرابلس

ما رح تندموا إنكن زرتوا هالسوق! يعتبر سوق طرابلس الأكبر بلبنان، وفي جواتو تسعة أسواق تانية! بتلاقوا في سوق الصابون، سوق العطارين، سوق المجوهرات، وغيرن كتير كتير. رح تلاقوا على الأكيد قصص مش شايفينا بغير محلات بلبنان.

٦. سوق حمانا

من أجمل الأسواق بلبنان، بتلاقوا المحلات والقهاوي كلا عم بتعج بالسوق وفيكن كمان تميلوا تشربوا قهوة مع قطعة حلو. وأكيد وين ما بتبرموا رح تلاقوا كرز ومحلات كرز وحلويات مصنوعة من الكرز.

٧. سوق حصرون

تعرفوا على سوق حصرون وعلى هالضيعة الحلوة، بتلاقوا بقلبو قهوة الضيعة العتيقة، محطة بنزين أثرية، محلات مونة بلدية ومحلات بوظة ومحلات حجارة عتيقة وعيون مي.

٨. سوق راشيا

بيرجع تاريخ سوق راشيا للقرن 17، وكتار بقولوا إنو هوي أقدم سوق بلبنان. زوروا دكاكينو الواسعة القديمة وتمتعوا بالفن المعماري القديم، وما تنسوا تتبضعوا من محلات المونة المحلية!

٩. سوق جزين السد

تمشوا بالسوق العتيق بالضيعة وتعرفوا على صناعة السكاكين المميزة يلي بتشتهر فيها جزين، زوروا الدكاكين العتيقة والقهاوي بالضيعة.

١٠. سوق صيدا

يعتبر سوق صيدا من الأماكن اللي لازم تتعرفوا عليها، مشهور بشوارعو الضيقة وحلوياتو العربية اللذيذة. ما بتمرق لحظة مملة بهالسوق، استمتعوا بالألوان الحلوة اللي بتزين هالمدينة، وما تنسوا تشتروا من الصابون البلدي والمناشف اليدوية كتذكار.

١١. سوق بعلبك

أحسن طريقة لتكتشفوا تراث بعلبك العريق هي خلال زيارة سوقها القديم! إضافة للمونة والدكاكين القديمة واللوحات القديمة، هالسوق القديم بعدو محافظ على سحرو التراثي وتحول مقصد لجميع السواح بقلب المنطقة.