قصص لن يفهمها إلا المغترب اللبناني

صدى وادي التيم-لبنانيات/

1. شنطة السفر بتصير متل النملية: مليانة مونة، زعتر بلدي، كشك، زيتون، مربى

2. أصعب لحظة لما بدك تفوت ع الحمام وتلاقي انو ما في شطافة

3. مستحيل تقدر تشطف البيت وتنضف سجاد متل ما إمك بتعمل بلبنان

إذا بتجرب تشطف مع سطل ميّ، بتوصل الميّ عند جارك بالبناية

4. لما بدك تضهر تاكل، ما بتروح إلاّ ع مطعم لبناني

وأفخم شي لما يفتحوا المطاعم المحبوبة هون فروع برا. متل لما كيّفوا المغتربين اللبنانيين لما فتح ملك الطاووق بكندا. 

5. بتشتاق لأبسط الأشيا اللي موجودة بلبنان: ريحة المنقوشة هي وطالعة من الفرن، صريخ إمك بالبيت، صبحيات الجيران اللي كانت تزعج نومتك

6. والنزلة ع لبنان أساسية بالصيفية 

7. ولما تجي بتعمل نفضة من فوق لتحت، بتروح عند الحلاق أو الكوافير، بتمرق عند حكيم الاسنان، بتعمل فحوصات  

8. القرايب بلبنان مفكرين معك مصاري، وانت بعدك عم تعصر معجون الإسنان بركي طلع فيه بعد 

9. وفجأة الناس صارت بتعرف السواقة وما في جور

10. بتتحمس لما تسمع حدا عم يحكي عربي أو لبناني

11. بتستغرب من كتير قصص: كيف بيّك كان يجيب الليمون بالكيلو، وهون بتشتري الليمون حبة بحبّتها

12. وأد ما حاولت تلاقي بديل، بس الخبز اللبناني واللبنة ما بيطلعوا زابطين إلا من لبنان

13. الشعور لما توصل ع لبنان وتشوف بيروت من الطيارة ما بينوصف

وبعدها بتزل ع المطار وبتذكرك الريحة ليه فلّيت 

14. وأقرف لحظة لما تصير بدك تجدّد الباسبور وتعلق بالمعاملات اللي ما بتخلص