شارع الـ “أوعا” والـ “عيب” بزمن “كورونا … بقلم نيكول صدقه

صدى وادي التيم – رأي حر بأقلامكم

كتبت الاعلامية نيكول صدقة على صفحتها الخاصة ما يلي :

لفتلي نظري بالمدة الاخيرة كيف عم يتعامل الناس مع هالجائحة اللي بكل لحظة عم تهدّد حياة كل واحد فينا… والطرق بتختلف من شخص للتاني متل اللي سايق عَ اوتوستراد بعز نهار ومتل اللي ماشي ع السكيت بالزاموق بنص الليل… ليش؟! لان في ناس قررت تتطلع تحكي وتقول انو هي مريضة بـ كوفيد 19 وتحجر حالا وتعطي انذار للي خالطوها انن يخضعوا للفحص وتوقف من حدة انتشار هالفيروس، لأن هالفيروس منّو “عيب” ولا واحد منّا حابب ينصاب فيه بس اذا نصاب فيه مش معناتا انو هوي شخص منبوذ وما لازم نتواصل معو خاصة بعد ما يخلص من فترة الحجر وتصير النتيجة سلبية… وفي ناس بسبب حكم الناس المسبق عايشة بعقلية “أوعا حدا يعرف” انو معي “كورونا” ليش ؟! لأن المجتمع رح يحكم عليه كأنو هوّي “قاتل أو مجرم” للأسف!.. في كتار من أصدقائنا وأحبابنا عايشين مع المرض وعم يتوجعو وبحاجة لكلمة أمل منا وشوية معنويات بس كرمال مبدأ “الأوعا” و”العيب” عم يتوجعو لحالن ويشوفو الموت بعينين بلا ما حدا يعرف…
مش عيب اذا مرضنا… ولا أوعا حدا يعرف … “ما حدا فوق راسو خيمة” مبارح هني يمكن بكرا نحنا… هيدي مش شيمنا طول عمرنا نفتخر بعاداتنا وتقاليدنا وتعاملنا مع خينا الانسان والنخوة اللي موجودة عنّا … الـ “عيب” انو نفقد الحس الإنساني و الـ “أوعا” أنو نصير بلا ضمير!..

نيكول صدقة – مديرة تحرير أصداء زحلة والبقاع