لبنان ما بقى يحمل دم ولعبة الدم مكلفة لكل اللبنانيين بقلم ميشال جبور

صدى وادي التيم-راي حر باقلامكم/

لو سمحتوا شوية هدؤ بدنا نهدي اللعب بالنار شوي
لبنان ما بقى يحمل دم لعبة الدم مكلفة لكل اللبنانيين
هل المرحلة بدها شوية وعي ولازم
كلنا نكسر نبيذنا بالتروي والعقل

تصريح سماحة الشيخ نعيم قاسم وردود الفعل عليه، من بعض الوزراء والمسؤولين السياسيين وحتى عبر وسائل التواصل، عم تاخد منحى تصعيدي خطير.
من الآخر، لبنان ما بيحمِل هيدا النوع من الخطاب، ولا هيدا النوع من التهديدات. البلد على كف عفريت، وأي كلمة ممكن تشعل نار ما بتنطفي.

التلويح بالعزل أو التهديد أو نغمة “نحنا ومن بعدنا الطوفان” ما بتفيد حدا، وبتذكّرنا بكل أسف ببدايات الحرب الأهلية بالـ75… لما فكروا يعزلوا الكتائب، انفجر البلد وضاع لـ50 سنة.

اليوم المطلوب من الجميع، من حزب الله، من سماحة الشيخ، من كل القيادات، ومن الإعلام والمناصرين على السوشيال ميديا، إنهم يهدوا.
ما بدنا لا شحن، ولا تخوين، ولا تهويل. بدنا حوار. بدنا طاولة. بدنا تفاهم.
بدنا استراتيجية دفاعية وطنية بيشارك فيها الكل، ما حدا بيقصي حدا.

لبنان اليوم بأمسّ الحاجة لوقف التراشق الكلامي والتهديدات.
البلد عم ينهار اقتصاديًا، الناس جوعانة، مذلولة، موجوعة، مش ناقصها حرب طائفية جديدة.

خلي العالم كله يعرف، لا أمريكا بتفيدنا، ولا إيران بتفيدنا، إذا نحنا ما اتفقنا مع بعضنا.
سيبونا من لعبة المحاور، واتركونا ندبّر حالنا كلبنانيين، لأن الخراب مش خيار… الخراب صار موت معلن، وما بقى فينا نتحمله.