“كلام لن يعجب البعض” بقلم عفيف دياب

صدى وادي التيم – رأي حر بأقلامكم /

كتب الاعلامي عيفي ذياب على صفحته في التواصل الاجتماعي 

مش غلط لو انو مفتي الجمهورية د. عبد اللطيف دريان، قال شي جملة عن اح..تلال الكيان لارضنا بالجنوبين اللبناني والسوري. ما راح يضر لو حكى بكلمته امام الشرع؛ انو لمؤسسته الدينية اراضي محتلة بمزارع #شبعا وتلال #كفرشوبا. ما راح يزعل الرئيس السوري من هيك موقف..واذا زعل بتكون سماحتك أديت قسطك الديني والانساني اقله تجاه ربعك وملتك بشبعا وكفرشوبا و #لبنان
مشكلتنا مع المؤسسات المدنية والدينية اللي بتمثل “طائفة” المفتي؛ انها ولا مرة طلّعت صوب الجنوب وخاصة صوب بلاد العرقوب عند السفح الغربي لجبل الشيخ.
مثلا المرة الوحيدة اللي شفنا فيها رئيس حكومة كانت سنة الألفين يوم زار الرئيس الراحل سليم الحص كفرشوبا والعرقوب.. وعتبنا على الرئيس #نواف_سلام مثلاً انو وصل على حدود العرقوب بزيارته للجنوب، وما خطر على بالو يطل شوي صوب هالمنطقة المدمرة واراضيها محتلة من سنة 1973.
زيارة المفتي لسوريا لا شك ضرورية ومهمة..بس عتبنا على سماحته انو ما حمل معو ملف المزارع والتلال ومروجهما وطلب من الشرع حسم موقف الشام من الناحية القانونية لبنانية المزارع والتلال.
كان الاجدر بالمفتي يقول كلمة واضحة بالشام انو اراضي المزارع والتلال هيي لاهالي شبعا وكفرشوبا وليست سائبة.
قبل التحرير سنة الالفين بكم شهر؛ زرت مفتي البقاع الشيخ خليل الميس وسلمته وثائق عن المزارع والتلال. ما قصر يومها المفتي المرحوم..حمل الملف وصار لازمة بكل خطاب لالو.. وهون ما قصر غازي كنعان بمعاتبة المفتي الميس بقسوة لانو حمل ملف المزارع والتلال.
صحيح انو ملف المزارع والتلال قضية سياسية ويمكن المفتي دريان ما بدو يناقش فيه؛ بس كمان هالشي ما بيمنع يظل يحكي فيه على المنابر ويعتبر الأرض هونيك أرضه وانو اهالي شبعا وكفرشوبا أصحابها الأصليين.
يا ريت يا سماحة المفتي بتعمل شي مشوار على بلاد العرقوب..وهيدا الدعوة كمان للكنيسة الارثوذكسية اللي الها أرض وعقارات بالمزارع والتلال.
العتب كبير..مش بس على المفتي دريان ومؤسسته الدينية؛ كمان على كل واحد حكى عن المزارع والتلال سابقا وحاضرا وما عمل شي قانوني..

الإيمان الكبير هوي ايمانك بارضك وبيتك وزيتونك وتينك يا مولانا ..وبنبيذك يا غبطة سائر المشرق