تعرفوا معنا على أهم مهرجانات شهر حزيران بلبنان!
صدى وادي التيم – لبنانيات /
بلشت الصيفية وبلشت المهرجانات الحلوة. زهقانين وعبالكن تضهروا برات البيت هالويك-أند؟ زهقتوا من المطاعم ومن قعدة الكافيهات ومن البحور ونفس المشاوير؟ خلينا ناخدكن مشوار على كم منطقة لي عاملين مهرجانات هالويك-أند.
١. مهرجان عمشيت، عمشيت (الدخول مجاني)
رح يضمن هالمهرجان لي من تنظيم Street Festival سهرات غنائية، ألعاب ونشاطات للولاد ومطاعم ومحلات ومعارض فنية وحفلات موسيقية وأشغال حرفية بالإضافة لمنتوجات يدوية ومونة بلدية ومحلات أكسسوارات. إذا ما عبالكن تشتروا شي، بتجوا بتصفوا السيارة وبتتمشوا مع أصحابكن وبتتفرجوا على البحر وبتحسوا بالأجواء الحلوة.
وين: بوليفار الرئيس ميشال سليمان
أيمتى: من 6 حزيران ل9 حزيران
إيا ساعة: من الساعة 4 بعد الضهر للساعة 11 بالليل
الرقم: 420 004 81
٢. مهرجان كرمالك يا بيروت، بيروت (الدخول مجاني)
عبارة عن مهرجان بيروتي من تنظيعم Smile Way Sports عم يصير هالويك-أند، رح يتخللو فرق رقص وعروض فنية وموسيقية وحفلة مع دي جي وعرض ساكسوفيني ونشاطات مخصصة للولاد وأكيد ستاندات أكل ومطاعم. الولاد رح يتسلوا كتير لأن رح يكون في Kids Zone مخصصة بس لإلن رح ينظموا فيها ألعاب ونشاطات مسلية متل ال animation وغيرها.
وين: الداونتاون، مقابل القاعدة البحرية
أيمتى: من 6 حزيران ل9 حزيران
إيا ساعة: من الساعة 4 بعد الضهر للساعة 12 بالليل
الرقم: 318 780 71
٣. مهرجان الكرز، حمانا (الدخول مجاني)
يوم الكرز السنة رح يصير نهار الأحد وأكيد هالنشاط المميز كتير بسلي ورح يخليكن تعملوا ذكريات ما بتنتسى. رح تبرموا على كل جنينات مزارعي الضيعة وتحوشوا كرز قد ما بدكن وتعبوا سلتكن، بس تخلصوا رح تتجمعوا بسوق حمانا العتيق وتتفرجوا على ستاندات الأكل والشرب والمعارض الفنية والأشغال الحرفية بالإضافة لمنتوجات يدوية ومونة بلدية ومحلات إكسسوارات ورح تتفرجوا كمان على عروض جمبازية. لي بميز هالمهرحان غير إنو رح تحوشوا كرز بإيديكن، رح تلاقوا كمان كتير منتجات طيبة معمولة من كرز متل مربيات وعصير كرز وحلويات على كرز.
وين: ساحة ضيعة حمانا
أيمتى: الأحد 9 حزيران
إيا ساعة: من الساعة 10 الصبح للساعة 7 بالليل
الرقم: 122 351 81
٤. مهرجان لونها، مار الياس
المهرجان رح يكون ولعان هالسنة بنسختو التالتة مع عروض ترفيهية وفرقة باراد وعروض فنية، وحفلة زومبا ونشاطات ترفيهية، بالإضافة لستاندات محلات تجارية وستاندات مطاعم ومشروبات وحلويات. مش بس هيك، الولاد عندن كمان حصة بهالمهرحان لأن رح يكون في محل ليلعبوا ويتسلوا ويتعرفوا على الولاد الباقيين.
وين: شارع مار الياس، بيروت
أيمتى: الأحد 9 حزيران
إيا ساعة: من الساعة 10 الصبح للساعة 11:30 بالليل
الرقم: 110 061 76
