٨ مناطق لبنانية متل الجنة على الأرض بالشتوية

مشهور وطننا لبنان بالمناظر الطبيعة الشتوية اللي ما بتلاقوا منها بالعالم العربي وحتى العالم كله، مساحات مغطيها التلج والغابات المعمّرة والجبال العالية، كرمال هيك، شوفوا معنا ٨ مناطق لبنانية متل الجنة على الأرض بالشتوية لازم تزورها.

١- بشري الأرز – الشمال

موطن لغابة أرز الرب ومحل ولادة الكاتب اللبناني جبران خليل جبران، فيكن تزوروا هل منطقة وتمارسوا رياضة التزلج وترجعوا تزوروا غابة الأرز ومتحف جبران خليل جبران وتتمشوا بين البيوت القديمة.

٢- حصرون – الشمال

معروف عن حصرون انها “وردة الجبل”، قاعدة هالمنطقة على وادي قنوبين ومشهورة بيوتها بقرميدها الأحمر وشوارعها العتيقة والمناظر الطبيعية والجبلية الروعة بالشتا. وإذا حابين تعرفوا كيف فيكن تقضوا نهار بالمنطقة، شوفوا المقال هون.

٣- جزين – الجنوب

من أروع المناطق بلبنان وموطن لأكبر غابة صنوبر بتحضن الشلالات المتدفقة، فيكن تاكلوا من مطاعمها لقمة لبنانية على أصولها ودوقوا أطيب لحمة نية على الطريقة الجنوبية عند مطعم الشالوف، ترجعوا تزوروا شلالها العظيم، وتستمتعوا بالمناظر الجبلية، وتمشوا بالطبيعة، وإذا عبالكن تعرفوا شو ممكن تعملوا بعد بهالمنطقة الساحرة، شوفوا الرابط هون.

٤- كفرحونة – جزين، الجنوب

هالمنطقة الجنوبية معروفة بخضارها وأرضها الغنية وأكلها التقليدي والمناظر التلجية الساحرة، بيوتها عتيقة غامرها التلج وبتجاورها الجبال، وعندن كمان أطيب صاج بأفران الضيعة.

٥- القبيات – الشمال

هالضيعة تم تتويجها أجمل ضيعة بلبنان من سنتين، محضونة بشجر الأرز والصنوبر وغنية بالخضار، منطقة هادية ورايقة لكل اللي بحبوا يمارسوا رياضة المشي بالطبيعة أو التخييم وكمان معروفة بغناها بالأثريات والمطاعم المهضومة. إذا حابين تعرفوا شو ممكن تعملوا بالمنطقة، شوفوا دليلنا هون.

٦- القموعة فنيدق – عكار، الشمال

بتجاور غابة العذر اللي بتحتوي على شجر السنديان، العرعر، الأرز والسرو لي صرله صامد آلاف السنين، بتناموا ليلة بأجمل أكواخ خشبية عند منتجع الكهف جنب الجبال والتلج وبتقضوا أجمل وقت بعيد عن العالم.

٧- اللقلوق – كسروان

بتطلعوا على هالمنطقة وبتلاقوا أجمل المناظر مغطاية بالتلج الأبيض بالشتوية وجنة خضار بالصيفية، وإذا بدكن تعرفوا شو فيكن تعملوا نشاطات بالمنطقة، شوفوا هون

٨- الفلوغا – بعبدا

بتلاقوا بحيرات ساحرة الجمال وجبال عالية ووديان بتاخد العقل، هالمنطقة بتسحركن بالفيو بالشتوية وبفيو غياب الشمس مع أرض مفروشة بالتلج، من أروع المناطق للألعاب التلجية والتخييم وغيره.

ساره ترحيني