برمة بضيع الجنوب: ١٠ جواهر مخفية وكومة جمال

الجنوب اللبناني هو جزء ساحر من بلدنا. كيف فيكن تتمتعوا بهل نعمة للآخر؟ أكيد مع الكاميرا والطبيعة الحلوة. طبيعة الجنوب الرائعة بتنسينا كل التفاصيل المزعجة بالبلد وبتخلينا متمسكين فيه وبجباله وبسهوله وبجماله، اخترنالكن أجمل الضيع اللبنانية بالجنوب يلي فينا نقضي فيها أجمل الأوقات.

1. كفرحونة، جزين

بتحتضنها الجبال من جهاتها الأربعة، غنية بالينابيع والأنهار، المعابد الدينية، المواقع الأثرية، دير مار جرجس المزيرعة وآثاره العتيقة وأحد أهم معامل الزعتر البلدي بلبنان The Good Thymes لي بيجمع بين القديم والجديد وبقدم كل نكهات وخلطات الزعتر.

2. إبل سقي، مرجعيون

عروسة الجنوب، مغمورة بطبيعة إستثنائية بتعكس الجمال الريفي وبتغني شجر الزيتون حكاية سهل مرجعيون وجبل حرمون. بضم البلدة محمية طبيعية تعد موطن لأنواع طيور مهاجرة مهددة عالمياً بالإنقراض، بيوت الفلاحين القديمة، كنيسة مار جريس التراثية، حديقة مهاتما غاندي ومعمل سعادة للصابون البلدي.

3. بنت جبيل، النبطية

بنت جبيل ضيعة الفخر والعز والكرامة، بتشتهر بشوقعا الشعبي الشهير أو سوق الخميس لي بيجمع مختلف الزوار، السواح والمقيمين. هي بلدة تراثية انعرفت بالماضي الجميل بزراعة الكرمة، القمح، الزيتون والتبغ. من أبرز المعالم السياحية بهل البلدة، المسجد الكبير، الأباريق والخزفيات الرومانية والبيزانطية وآثار المقبرة الكنعانية الأثرية.

4. الريحان، جزين

ضيعة حلوة مشهورة بالريحان والحبق الموجود فيها بكترة. مغارتها جوهرتها الفريدة، وكنزها الدفين لي بيحكي قصة مكان واحد بأزمنة كتيرة لامست آلاف السنين. الريحان بلدة رايقة رومانس بتتربع على كتف الجبل، حلوة الحلوات، بفستانها الأخضر المشغول بأشجار الصنوبر والسنديان والمطرز ببيوتها المختلفة والموشح بشوارعها النضيفة ونسمات الهوا المنعش.

5. تبنين، بنت جبيل

مشهورة بقلعتها والحصن وحراشها المليانة بالأشجار المعمرة وبتتميز بسوق الجمعة الشعبي يلي بيجذب عدد كبير من الزوار. تعتبر غابة الصنوبر المكللة وينابيع تبنين من الثروات الغنية لي صارت مقصد لأهل المنطقة، وأهم هل الينابيع: عين المزراب، عين الحور، عين الوردة، وعين الخان.

6. جرجوع، النبطية

هي وحدة من أهم قرى الإصطياف بلبنان ومقصد للسياح والمصطافين الهاربين من لهيب الصيف وطالبين الهدوء والسكينة. اشتهرت جرجوع بمطاحنها ومعاصرها العتيقة على ضفاف نهر ومجرى نهر الطاسة وبصناعة الفخار، الشير، وزراعة التفاح والزيتون والحبوب والخضار على أنواعها، وعين إم يونس ونبع اللآلئ.

7. بكاسين، جزين

عروسة لبنان مكللة بلقب الجمال العالمي مغمورة بغابات الصنوبر الأكبر بالشرق من كل الجهات و المناظر الطبيعية لي بتحبس الأنفاس. بيوتها القديمة وشوارعها العتيقة بتحكي أساطير الإيام الحلوي وحياة التيتا والجدو، النباتات العطرية الطيبة، القرميد، الجسور القديمة، التراث المعماري والجمال الروحي.

8. قانا الجليل، صور

قانا بلدة تراثية، بتشتهر بمعالمها الأثرية والنقوش الصخرية والمغاور والمعابد والتماثيل القديمة. المعالم التاريخية والنصوص الدينية بترجح إنو يسوع المسيح قام بأول أعجوبة بقانا الجليل هالقرية يلي بتحتوي على العديد من الآثار. بلدة قانا من أروع المعالم التاريخية لي بتروي تاريخ عريق، من المغارة لي اتخذها المسيح مقر لإقامته والتبشير برسالته السماوية، ومقر الأمم المتحدة لي استهدفته الطائرات الحربية خلال حرب عناقيد الغضب عام 1996 معالم منثورة على مساحة البلدة بتروي حكاياتها مع الماضي والحاضر.

9. مغدوشة، صيدا

مغدوشة أرض القداسة والحضارة بتشتهر بالعديد من الزراعات متل الليمون والعنب بالإضافة لتميز أهلها بصناعة ماي الزهر، المربى وعصير الليمون. من أشهر المعالم بقرية مغدوشة كنيسة سيدة المنطرة.

10. عين إبل

عين إبل نقطة تلاقي الماضي والحاضر، البركة والصمود، الحب والأمان، تعتبر قرية تاريخية لأنها بتحتوي على العديد من الآثار وبتشتهر بزراعة الزيتون والمعاصر لصناعة الزيت. من أهم الأماكن الأثرية بالبلدة تلة شلعبون وتلة الدوير لي بتحتوي على آثار فينيقية متل المعاصر، الأجران والنواويس، عين تربنين، شرتة، منصورة، المغاور، العيون والكنايس.