يا نور نورك بسرعة انطفى …بقلم طوني مخايل عبدالنور

صدى وادي التيم – رأي حر بأقلامكم/

يا نور نورك بسرعة انطفى
ونهر جنة لَمعِة الشمعة خفى
قصتك نسّتنا أدونيس وعشتروت
وياما شموع تشعّلت جوا البيوت
بِ نهر ابراهيم القصص المقَدّسِة بتموت
بتموت القصص لكن بضل الوفا

ما ضل حدا ما بكي وقطّر دموع
وما ضل حدا ما ضوا ع نيّتِك شموع
تحرّك بقلبنا ع فرقتك أثمن شعور
وجوّاتنا مين بيجبر الخاطر المكسور
بينطفي نور بيشعل قبالو نور
وكلما مرقنا بتجربة بيقوى الخشوع

عم ترفرف روحك فوق ب الجنة
رفة فراشة ع ضفة نهر جنة
الجنة بحضورك مأكد زادت حلا
وعالأرض قالوا الكل لا حول ولا
صرتي ملاك ورحلتِك رحلة صلا
يا عروس السما بتلبقلك الحنّة

شو رح منقول للعيلِة الكئيبة
ما أصعب الشّرح قدام المصيبة
والد ووالدة وخي مفجوعين
ورفقة وقرايب وأهل مصدومين
والوطن كله غارق بصوت الأنين
ما حدا حاسب هيك بتغيبي

بإسمي وإسم عائلتي أتقدم من الأخ فادي حاطوم وعائلته بأرق وأعمق معاني العزاء بانتقال فلذة كبده إلى دنيا الحق
كنا آملين أن يكون الخبر مفرح ولكن هذا هو القدر الذي يتربّص بكل إنسان .. الحزن كبير ولكن الإيمان قوي .. في جنان الفردوس بإذن الله

بقلم طوني مخايل عبدالنور