صدى وادي التيم – سياحة /

سامعين بضيعة كفرمتى؟ ضيعة استثنائية بقضاء عاليه، قاعدة ع ارتفاع ٧٠٠ متر وبتطل ع ساحل بيروت والمتوسط، بيرجع تاريخها لسنة ١٣٠٠ ق.م. تعتبر كفرمتى وجهة سياحية بإمتياز لمحبي المغامرة والجبل، فيها من الجواهر المخفية اللي مش سامعين فيها، ومن المعالم العريقة اللي كانت شاهد حيّ ع تاريخ المنطقة. اليوم رح نعرّفكن ع الفزر، وحدة من كنوز كفرمتى الجيولوجية.

من معمل الحرير الأثري اللي صرلو من سنة ١٨٦٠، لجلال الزيتون وطواحين الميّ، كان قدر ضيعة كفرمتى انو تتميّز عن غيرها. اليوم، بتلاقوا بكفرمتى معلم جيولوجي طبيعي بيحسسّكن إنكن بقلب غراند كانيون بولاية أريزونا الأميركية. 

هالموقع الفريد معروف باسم “الفزر” وهو عبارة عن معلم صخري، مؤلف من صخرتين منفصلين ومشكلين حيطين بيفصل بينن ممرّ لا يمكن وصف جمالو. 

عرض الممرّ ٤ أمتار، أمّا الصخور طولها ٢٠ متر وبتمتد ع ٢٠ متر لقدام. عم تتخايلوا الدهشة اللي ح تحسوها لما تمرقوا بهيك موقع، وتتأملوا بالصخور وتكوينها؟

 هالممرّ بيوديكن بالآخر ع نهر الدامور، ويعتبر جوهرة كفرمتى المخفية. ما شهد ع جمالها إلا اللي عندن روح المغامرة وناس المنطقة. 

هالمعلم الجيولوجي بيطل ع طبيعة جبلية من الخيال، بتشوفوا جلال الزيتون، بساتين الليمون، وأحراش الصنوبر. 

جهزوا الصبّاط المريح، اطلعوا ع كفرمتى، زوروا الفرز، وكفّوا مشواركن ع النهر وعملوا أجمل نزهة ع ضفافو. 

خبرونا، تحمستوا تطلعوا ع كفرمتى وتزوروا الفزر؟

سارة ترحيني – بيروت