Metrooo this wayyy جملة : تجتاح التواصل الاجتماعي

الشغلانة عبارة عن إنه قاعد علي كرسي جنب الإستاد وماسك ميكروفون زي بتاع الروبابيكيا ده ولابس كف كبيييير وكل شغلنته إنه يقول الجملة ده بس فقط لا غير “Metro this way”علشان يوجه الجمهور والأجانب لإتجاه المترو !!

إنت متخيل قاعد ٨ او ٩ ساعات ومش بتقول غير الجملة ده بس.

أبو بكر قرر يسلي نفسه فبقي يقولها بطرق مختلفة ومتكررة ويغنيها للناس وبرضه مش بيقول غير الجملة هي هي بس بطريقة لذيذة.

يشاء القدر إن الجماهير والناس والمواطنين يتفاعلوا معاه ويتحول أبو بكر من مجرد شخص قاعد علي كرسي كمرشد للزوار للمترو إنه يبقي “أيقونة” المترو والمونديال لكل الناس..

الجماهير بقت تروح هناك تقول معاه وتغني معاه ويتصوروا معاه ويصوروه.. كل الصحف العالمية والمحلية فضلت تتكلم عن العظمة ده.. لدرجة إن “الشيف براك” يروح عنده ويقف قدامه ويقلب حلة المحشي الشهيرة بتاعته علي أنغام “Metro this way” ويتصور معاه كمان وينزله علي صفحته الرسمية.

دولة قطر بقي قالت لا إحنا مش هنفضل ساكتين علي الجمال والعظمة اللي بيعملها أبو بكر ده.. فجابوا أبو بكر وكرموه وإدوله كمية هدايا لا تعد ولا تحصي من كل البرندات.. ومش بس كدة دول مدوا الفيزا بتاعته سنتين .. ومش بس كدة لا دول خلوه “سفير مترو قطر”.. وراحوا مسجلين صوته وطريقته وحطوها علي كل ميكروفونات مرشدين السياح للمترو وبقي صوته هو الصوت الرسمي لإرشاد مترو قطر خلال المونديال فبقيت تسمع صوته وطريقته في كل حتة في قطر..

راحة اللجنة المنظمة لكاس العالم قالت هيا الناس ده كلها تقدر الراجل ده وإحنا اللي راجل جاي من بلده علشانه منعملش واجب معاه.. راحوا بعتين للراجل دعوة VIP لحضور مباراة إنجلترا وأمريكا.. وهووووب بين الشوطين نزلوه الملعب وادوله المايك وأبو بكر يقول “Metro” وكل الجماهير اللي في الإستاد ترد عليه “This way” .

أبو بكر عمل بروفايل علي كل السوشيال ميديا والفيديوهات بتاعته تخطت المليون مشاهدة… وكأن ربنا بيقوله مش انت تعبت وسعيت فخد من حيث لا تدري

الخلاصة هنا إنك طالما قررت تسعي وتقبل شغلانة حاول تعملها بحب وبطريقتك وطول ما انت بتشتغل كويس فشغلك هيبان وهيسمع غصب عن عين أي حد..

مبروك علي أبو بكر كل الخير والرزق اللي ربنا رزقه به وشكرا ليه إنه علمنا درس كبير

منقول من أستاذ  Linked in.